ஐக்கிய நாடுகள் சபையின் பல்வேறு முக்கிய நிகழ்வுகளில் பங்கேற்பதற்காக, இந்திய நாடாளுமன்றத்தைச் சேர்ந்த 18 நாடாளுமன்ற உறுப்பினர்கள் அக்டோபர் மாதம் அமெரிக்காவின் நியூயார்க் நகருக்கு பயணம் மேற்கொள்ள உள்ளனர்.
அக்டோபர் 5 முதல் 9-ஆம் தேதி வரை நடைபெற உள்ள ஐக்கிய நாடுகள் சபையின் பல்வேறு நிகழ்வுகளில் இந்திய நாடாளுமன்ற உறுப்பினர்கள் பங்கேற்க உள்ளனர்.
இந்தியாவை பிரதிநிதித்துவப்படுத்தி செல்லும் நாடாளுமன்ற உறுப்பினர்கள் குழுவில், தமிழ்நாட்டின் சார்பில் தேசிய முற்போக்கு திராவிட கழகத்தின் பொருளாளரும், மாநிலங்களவை உறுப்பினருமான திரு.எல்.கே.சுதீஷ், MP., அவர்கள் பங்கேற்க உள்ளார்.
இந்தப் பயணத்தின் போது, ஐக்கிய நாடுகள் சபையின் சிறார் நிதியம் (UNICEF), ஐக்கிய நாடுகள் வளர்ச்சித் திட்டம் (UNDP) ஆகியவற்றின் அதிகாரிகளுடன் இந்திய நாடாளுமன்ற உறுப்பினர்கள் ஆலோசனை நடத்த உள்ளனர். மேலும், உலக அளவில் வேகமாக வளர்ந்து வரும் செயற்கை நுண்ணறிவு (Artificial Intelligence – AI) தொழில்நுட்பம், அதன் எதிர்கால பயன்பாடுகள், சமூக மற்றும் பொருளாதார தாக்கங்கள் உள்ளிட்ட முக்கிய அம்சங்கள் குறித்து, ஐக்கிய நாடுகள் சபை பொதுச் செயலாளரின் தொழில்நுட்ப தூதருடனும் இந்திய நாடாளுமன்ற உறுப்பினர்கள் கலந்துரையாட உள்ளனர்.
தமிழ்நாட்டின் சார்பில் இந்த முக்கியமான சர்வதேச நிகழ்வுகளில் தேமுதிக பொருளாளரும், மாநிலங்களவை உறுப்பினருமான திரு.எல்.கே.சுதீஷ், MP., அவர்கள் பங்கேற்பது தமிழ்நாட்டிற்கும், தேசிய முற்போக்கு திராவிட கழகத்திற்கும் பெருமை சேர்க்கும் நிகழ்வாகும்.
இந்த சர்வதேசப் பயணத்தின் மூலம் இந்தியா மற்றும் தமிழ்நாட்டின் குரலை ஐக்கிய நாடுகள் சபையின் சர்வதேச அரங்கில் வலுவாக பதிவு செய்து, புதிய தொழில்நுட்பங்கள் மற்றும் உலகளாவிய வளர்ச்சிப் பாதைகள் குறித்து பயனுள்ள கருத்துகளைப் பரிமாறிக் கொண்டு திரும்புவதற்கு திரு.எல்.கே.சுதீஷ்,MP., அவர்களுக்கு தேசிய முற்போக்கு திராவிட கழகம் சார்பில் வாழ்த்துகளைத் தெரிவித்துக் கொள்கிறோம்.
தேசிய முற்போக்கு திராவிட கழகம்
தலைமை கழகம்
By
