வீரமங்கை வேலுநாச்சியாரின் வெற்றிக்குத் துணைநின்று, ஆங்கிலேயர்களின் ஆதிக்கத்திற்கு எதிராகத் துணிச்சலுடன் போராடிய மாபெரும் சுதந்திரப் போராட்ட வீரர்களான பெரிய மருது, சின்ன மருது சகோதரர்களின் 225-வது நினைவு தினமான இன்று, அவர்களின் வீரத்திற்கும் தியாகத்திற்கும் எனது வீரவணக்கத்தைச் செலுத்துகிறேன். தாய்நாட்டின் விடுதலைக்காகவும், மக்களின் உரிமைகளுக்காகவும் தங்களது இன்னுயிரைத் தியாகம் செய்த மருது சகோதரர்கள், தமிழர்களின் வீர வரலாற்றில் என்றும் அழியாத இடத்தைப் பெற்றுள்ளனர். 1801-ஆம் ஆண்டு ஆங்கிலேயர்களுக்கு எதிராக மக்களை ஒன்றிணைத்து விடுதலை உணர்வை விதைத்த அவர்களின் போராட்டமும், தேசப்பற்றும், தன்னலமற்ற தியாகமும் தலைமுறைகள் கடந்தும் நமக்கு எழுச்சியூட்டுகின்றன.
வீரம், மானம், தேசப்பற்று, மக்கள் நலன் ஆகிய உயரிய கொள்கைகளுக்காக வாழ்ந்து மறைந்த மருது சகோதரர்களின் இலட்சியங்களைப் போற்றிப் பாதுகாப்பதே நாம் அவர்களுக்குச் செலுத்தும் உண்மையான மரியாதையாகும். தமிழினத்தின் பெருமையையும், வீரத்தையும் உலகறியச் செய்த அந்த மாவீரர்களின் புகழ் காலத்தால் அழியாது. மருது சகோதரர்களின் 225-வது நினைவு தினத்தில் அவர்களுக்கு எனது பணிவான வீரவணக்கங்கள்.
By
